Comezou a conta atrás para o inicio das Festas de Ribeira e o acondicionamento temporal do espazo portuario para acoller as atraccións das festas obrigou, como de costume, a profundos cambios na circulación e no estacionamento en Santa Uxía. Para comezar, a partir das 15,00 deste sábado 26 de xullo restrinxiuse aparcar e circular nas seguintes zonas: avenida do Malecón, explanada portuaria (onde ten lugar cada sábado o mercadño ambulante) e avenida das Airós. En termos concretos, os principais cambios manifestáronse en que xa non está permitido estacionar en toda a área portuaria e, ademais, estableceuse a dobre circulación nun dos carrís do Malecón para deixar libre o outro carril e habilitar aí os postos dos feirantes.
Ademais, estará restrinxida a circulación e/ou o estacionamento nas seguintes zonas urbanas:
-Avenida das Airós (a vía de acceso á actual Comisaria de Policía Nacional), a partir das 15:00 horas do sábado 26 de xullo, estará prohibido o estacionamento (reserva espazo para feirantes).
-Praza dos Mariñeiros (a rúa a carón do Parque Pedra Pateira), a partir das 08:00 horas do mércores 30 de xullo, estará prohibido o estacionamento.
-Praza de Pontevedra (vía lindeira coa antiga fábrica de Cerqueiras), a partir das 08:00 horas do mercóres 30 de xullo, estará restrinxida a circulación e estacionamento por motivo da instalación do palco e actuación da orquestra.
-Rúa Portugal (vía da parte posterior do antigo Auditorio Municipal), a partir das 08:00 horas do mercóres 30 de xullo, estará restrinxida a circulación e estacionamento por motivo da instalación do palco e actuación da orquestra.
-Rúa Estatuto (vía onde está emprazada o colexio Galaxia), a partir das 08:00 horas do domingo 3 de agosto, estará restrinxida a circulación e estacionamento por motivo da celebración da tradicional sardiñada.
A Policía Local de Ribeira informou de todos estes cambios ao detalle e aproveitou para pedir desculpas polas molestias ocasionadas á veciñanza.
