Os 52 veleiros e as máis de 200 persoas que toman parte na V Ruta Rías Baixas-Camino de Santiago pola ría de Muros Noia enfilaron este martes 1 de xullo cara a Portonovo, onde agardaba a súa chegada ao Club Náutico a iso das 20.00 horas. Do mesmo xeito que na xornada deste luns, o tempo acompañou aos peregrinos pois non só non houbo físgoa algún da onda de calor senón que imperou unha lixeira brisa que axudou á navegación e fixo que a temperatura fose excelente para o desenvolvemento da xornada.
Unha xornada na que a ría de Aldán foi a gran protagonista, ao ser “tomada” polas embarcacións do roteiro, que fondearon nela para pasar a noite de onte luns e desde onde saíron a media mañá deste martes 1 de xullo camiño á illa de Ons, espazo natural protexido onde gozar da natureza, antes de enfilar a proa cara a Portonovo. Esta localidade costeira, con tradición pesqueira e alma festiva, recibiu aos peregrinos cunha celebración gastronómica protagonizada polo marisco e os produtos da contorna, unha homenaxe á riqueza culinaria galega e un momento de confraternización entre os participantes.
Para mañá mércores 2 de xullo está previsto que a frota parta a media mañá do Club Náutico de Portonovo cara á ría de Arousa, o maior dos esteiros galegos e un dos máis produtivos do mundo en mariscos e pesca artesanal. A frota navegará entre bateas e paisaxes mariñas de gran beleza ata alcanzar A Pobra do Caramiñal, onde a xornada finalizará cunha cea mariñeira ao aire libre.
Uns clubs náuticos nos que os máis de 200 participantes na V Roteiro Rías Baixas-Camino de Santiago pola ría de Muros Noia están a selar as súas credenciais xacobeas, pois ten un dobre premio: todos aqueles que completen o sábado o percorrido a pé desde Bertamiráns (Ames) ata a catedral de Santiago poderán recibir a Compostela; pero ademais o peregrino náutico que consiga máis selos para a súa credencial recibirá un “cofre pirata” repleto de produtos da ría de Muros Noia: conservas, galletas, licores… Uns selos que poden conseguir tanto nos clubs náuticos como noutros establecementos do percorrido.
Un itinerario con alma
Un total de 52 embarcacións participan nesta edición 2025, que se celebra do 30 de xuño ao 5 de xullo e que permite aos tripulantes vivir a experiencia do Camino de Santiago pola ría de Muros Noia, recuperando unha tradición que se remonta á Idade Media, cando peregrinos de toda Europa chegaban por vía marítima a Galicia. O roteiro segue o itinerario dunha desas peregrinacións, a do navegante veneciano Pietro Querini (1431).
Unha peregrinación especial pois establece 3 feitos constituíntes do Camino da Ría de Muros Noia: o punto de inicio (o porto de Muros), a distancia (73 km) e o trazado. Ademais, forma parte do itinerario galego da Vía Querinissima, que está á espera do seu recoñecemento como itinerario cultural europeo. De feito, a Asociación Vía Querinissima conta cunha caseta na V Ruta Rías Baixas-Camino de Santiago da Ría de Muros Noia, no que dá a coñecer a actividade desta entidade cultural sen ánimo de lucro nacida fai máis dunha década a raíz dun primeiro acordo de amizade entre os municipios de Rost (Noruega) e Sandrigo (Italia) e despois dun convenio de cooperación cultural e económica entre as rexións de Nordland e Véneto. Esta asociación promove un turismo cultural e enogastronómico pausado e sostible, que une cidades e rexións de trece países distintos.
