Menos de dúas horas foron o que duraron as máis de 1.000 racións do produto Lirio de Ribeira que serviu a OPP83-Cooperativa Sociedade Galega do Mar Santa Uxía, coa axuda do catering Baiuca, durante a segunda xornada do XVII Encontro de Embarcacións Tradicionais de Galicia, que se celebra en Ribeira entre os días 16 e 20 de xullo.
A OPP83 ofreceu unha degustación gratuíta de Lirio de Ribeira en tempura durante a celebración do XVII Encontro de Embarcacións Tradicionais de Galicia, que organiza estes días Culturmar en colaboración coa Confraría da Dorna e do Concello de Ribeira, entre outras entidades. A acción da OPP83, que se desenvolveu este venres a partir das 12.30 horas, gozou de gran expectación entre as persoas asistentes, tal e como demostran as ringleiras que se rexistraron para facerse cunha ración deste peixe branco que representa a principal captura na lonxa de Ribeira.
Durante a degustación estiveron presentes integrantes da OPP83 como o seu presidente José Antonio Pérez, a súa xerente María José Casais e o membro do Consello Reitor Pablo Pérez. A iniciativa da Cooperativa recibiu tamén o apoio concelleiro do Mar de Ribeira, Fernando Abraldes, do alcalde de Ribeira, Luís Barral, e da xefa de distrito da Capitanía Marítima de Ribeira, Leire Blanco.
A directiva da OPP83 felicitou ás entidades organizadoras polo excelente e duro traballo feito na celebración dun evento de tal magnitude e agradeceu que tiveran en conta o Lirio de Ribeira neste encontro. Casais tamén quixo subliñar a necesidade de manter viva a cultura mariñeira con actividades deste tipo nas que se mestura tradición, navegación e gastronomía como parte da memoria colectiva de Ribeira e do conxunto de Galicia.
Lirio de Ribeira, un peixe de marca garantida
O Lirio de Ribeira é a marca colectiva rexistrada pola OPP83 a finais de 2022 na Oficina Española de Patentes e Marcas (OEPM). Os barcos que capturan o Lirio de Ribeira deben cumprir unha serie de parámetros de calidade para poder vender o peixe baixo esta etiqueta. O peixe amparado por esta marca conta cun dobre etiquetado: a etiqueta de rastrexabilidade co caderno de viaxe do produto pesqueiro e un distintivo co logo do Lirio de Ribeira que garante a procedencia, frescura e orixe do peixe.
Esta acción promocional integrada no programa de Culturmar forma parte do PPeC 2025 da OPP83, co-financiado pola Xunta de Galicia e o Fondo Europeo Marítimo, de Pesca e Acuicultura (FEMPA).
