A Consellería do Mar continúa a súa aposta pola profesionalización e competitividade do sector marítimo-pesqueiro galego a través de novas iniciativas formativas. A titular do departamento, Marta Villaverde, visitou este sábado o Curso de Mariñeiro de Ponte, que se desenvolve en Ribeira co apoio económico do Fondo Europeo Marítimo, de Pesca e de Acuicultura (FEMPA).
Esta formación conta cun investimento de 144.576 euros, achegados pola Xunta de Galicia dentro da liña de axudas 2024-2025, e beneficia directamente a 20 persoas. A acción insírese nun conxunto de 26 cursos que inclúen tamén temáticas como seguridade marítima, loita contra incendios, formación sanitaria, embarcacións de supervivencia, botes de rescate rápidos, mariñeiro de máquinas ou condución segura.
Segundo destacou Villaverde, estas iniciativas son fundamentais para facilitar o relevo xeracional no sector e mellorar as condicións laborais dos profesionais do mar. En total, o Executivo galego destina 1,5 millóns de euros para o desenvolvemento destas accións formativas, que se suman ás impartidas polos centros dependentes da consellería.
Ao longo de 2024, xa se celebraron 20 cursos organizados por seis organizacións pesqueiras, que formaron a 273 persoas. A oferta amplíase este ano con 97 novos cursos promovidos por 17 entidades, entre as que se atopan as confrarías de Ribeira, Noia, Porto do Son, Lira, O Grove, Burela, Barallobre e a Cooperativa de Armadores de Vigo.
“A formación é unha ferramenta esencial para asegurar o futuro do sector pesqueiro galego, facelo máis competitivo e seguir liderando en Europa”, subliñou a conselleira durante a súa visita.
