As e os seareiros dos deportes de raqueta van ter esta fin de semana en Noia unha cita diferente: a primeira edición do Torneo de Pickleball, que se celebra este 2 de agosto, a partir das 10.00 horas, e que ten as inscricións abertas ata este mércores 30 de xullo, a través de Internet. A proba, que está previsto que se desenvolva na Alameda de Noia, inclúe categorías sénior e sénior de máis de cincuenta anos. Organizan Pickle360 e a Concellería de Deportes de Noia. Haberá degustación de pizza para as persoas participantes, amais de agasallos, sorteos de material deportivo e empréstamos de pas para xogar.
Para quen non o saiba, o pickleball é un deporte de pas (ou deporte de raqueta) que combina elementos do tenis, pádel, bádminton e tenis de mesa, e no que dous ou catro xogadores golpean unha bóla por encima dunha rede, buscando anotar puntos e gañar set. Trátase, en palabras da organización, “dun deporte novo, divertido e para todas as idades”.
