A Asociación de Empresarios de Ribeira segue a consolidar as bases da nova edición de Gastromar, co obxectivo de acadar as máximas implicación, participación e repercusión. Perfilar os detalles da nova edición desta feira gastronómica dos produtos do mar de Ribeira, que está prevista para os días 22, 23 e 24 de agosto, foi o obxectivo dunha xuntanza de traballo celebrada este mércores 2 de xullo na sede da patronal (AER).
Entre os asistentes que xa confirmaron a súa participación atópase a presidenta das praceiras (Asociación da Praza de Abastos de Ribeira), Juana Gómez, quen, xunto co seu colectivo, contribuirá coa exposición dos peixes que comercializan; A Vinoteca de Tucho, representada polo seu xerente, Tucho Sampedro; a Cooperativa de Armadores, na persoa da súa xerente, Mª José Casais; o Concello de Ribeira, representando polo concelleiro do Mar, Fernando Abraldes; os patróns maiores das confrarías de Aguiño e Ribeira, José Antonio Santamaría e José Antonio Pérez (respectivamente); así como os representantes da empresa Chicolino, Arturo e Rebeca.
Como en edicións anteriores, aproveitouse a xuntanza de traballo para lanzar un convite a todas aquelas empresas e institucións interesadas en colaborar “a sumarse a este evento de gran relevancia para a nosa cidade”.
Durante a reunión abordáronse diversos aspectos loxísticos necesarios para a organización das actividades programadas. A patronal adiantou que se van celebrar en Gastromar degustacións de mariscos como ameixas, navallas, mexillóns e camaróns; peixes como xurelos, lirios, sardiñas e xoubas; e, por suposto, a empanada, “prato imprescindíbel na nosa tradición culinaria”, sinalaron.
A Feira Gastromar está impulsada dende a Asociación de Empresarios de Ribeira en colaboración coas Confrarías de Aguiño e Ribeira, cos produtores de mexillón (OPMEGA), co Concello de Ribeira e, tamén coa Cooperativa de Armadores de Ribeira, a Asociación de Praceiras de Ribeira e unha manchea de empresas e entidades. O obxectivo será novamente “poñer en valor e dar a coñecer os peixes e mariscos da nosa ría”, sinalaron, ao tempo que destacaron a necesidade de reivindicar os produtos que, polas razóns que sexan, non adquiren as meirandes cotización e demanda no mercado.
