Tarde piache: durante décadas, buques de Reino Unido, Francia, Alemaña e Suiza guindaron ao Atlántico centos, milleiros de bidóns radiactivos cuxa carga exacta se ignora do mesmo xeito que se descoñecen os presumibles efectos desa carga na flora e fauna desta ampla zona marítima na que se localiza, entre outros caladoiros, o denominado Banco Galego.
Xa nos lonxanos anos 90, Santa Uxía de Ribeira ocupaba boa parte da actualidade internacional pola protesta exercida daquela por representantes de partidos galeguistas, socialistas, comunistas e nacionalistas que, a bordo de pesqueiros coma o Xurelo, puxeron proa á zona de vertidos, conscientes do dano que se estaba a causar ao mar aos seus habitantes. Foron días de intranquilidade debido a que as operacións de vertido non cesaban mentres políticos e ecoloxistas percorrían de proa a popa de cada un dos buques contaminantes o espazo que cada un deles ocupaba no mar. Mesmo chegaron a guindar sobre os que protestaban algúns deses bidóns e utilizaren mangueiras de auga a forte presión para obrigalos a afastarse do “escenario” do vertido.
Agora, unha misión internacional analiza os efectos provocados por milleiros de bidóns radioactivos guindados por buques de porte medio ao Atlántico durante anos a uns mil quilómetros da costa galega. A estes navíos sumáronse outros de carácter militar, cuxa carga, sen ser probablemente radioactiva, si era sumamente prexudicial por se tratar de munición supostamente inservible para os exércitos mais da que o mar se encargaría de destruír sen ter en conta o prexuízo que causaban.
Como se pode comprobar, o mar sempre foi un contedor do lixo de toda caste xerado en terra, onde nunca fora tratada axeitadamente, aínda a costa de converter o fondo mariño en cemiterios nucleares.
A misión científica tenta analjsar máis de 22.000 toneladas de material guindado ao Atlántico durante decenios e sen que durante este tempo se procedera a estudar cal era/é o seu estado, sen ter en conta quen se alimenta dos animais mariños desa ampla zona afectada nin do importante número de mariñeiros que faenan neles.
