Os peregrinos enrolados na experiencia El Camino a Vela chegaron este domingo 29 de xuño aos portos de Escarabote e Cabo de Cruz no concello de Boiro. A recepción realizouse no Club Náutico de Cabo de Cruz por parte do presidente de Barbanza Arousa, alcaldes, o director da Sociedade de Xestión do Plan Xacobeo, o presidente do Clúster de Turismo de Galicia, a xerente da Mancomunidade, concelleiras e representantes do operador Northmarias.
Apoio da Mancomunidade
A Mancomunidade Barbanza Arousa apoia un ano máis a peregrinación xacobea a través da Ruta Mar de Arousa Río Ulla da experiencia El Camino a Vela.
Déronlle a benvida o presidente da Mancomunidade Barbanza Arousa e alcalde de Rianxo, Julián Bustelo; os alcaldes de Boiro e A Pobra do Caramiñal; o director da Xestión do Plan do Xacobeo, Idefonso de la Campa; o presidente do Clúster de Turismo de Galicia, Cesáreo Pardal; a xerente da Mancomunidade, Fátima Cachafeiro; concelleiras e representantes de Northmarinas.
“Esta actuación responde á estratexia da Mancomunidade de desestacionalización da demanda e de mellorar a competitividade” apuntou o presidente de Barbanza Arousa.
Os peregrinos, na súa maioría procedentes de Francia, desfrutaron dunha visita guiada en Cabo de Cruz, co obxecto de que “coñezan o territorio e poidan converterse en prescriptores” manifestou Fátima Cachafeiro, xerente da Mancomunidade.
Asemade, José Ramón Romero, alcalde de Boiro, recalcou a “importancia para Boiro de dar a coñecer as posibilidades marítimas que ofrece este concello e o resto de Barbanza Arousa, con portos de primeiro nivel e recursos marítimos de gran potencial”.
Despois da visita guiada realizouse a recepción institucional e posterior cea con produtos de Barbanza Arousa, poñendo en valor o produto fresco e en conserva, maridados con viños da IXP Terras do Barbanza e Iria.
Idefonso de la Campa, director do Xacobeo, subliñou a importancia do Camiño de Santiago para Galicia como produto consolidado.
Asemade, Cesáreo Pardal, aproveitou a ocasión para agradecer as iniciativas que, coma esta, potencian Galicia no eido internacional.
A cea realizouse na terraza do establecemento Ronsel, emprazado no Club Náutico de Cabo de Cruz, a cargo do cociñeiro Alberto Carou, concesionario das instalacións.
A travesía El Camino a Vela realízase en grupo para dar a coñecer a experiencia da navegación sustentábel na costa norte da Península, amosar as características, cultura e gastronomía de cada localidade na que se recala e atraer navegantes nacionais e internacionais, promovendo un modo diferente de facer o Camiño de Santiago.
Nesta X edición de El Camino a Vela celébrase unha década de navegación compartida, espiritualidade e turismo azul responsábel. Así mesmo, este ano móstrase na súa faceta máis solidaria, a colaboración coa campaña A vela contra la ELA, co obxectivo de recadar fondos para mellorar a vida de quen padecen esta enfermidade.
Partiron o pasado 6 de xuño de La Rochelle (Francia) estando prevista a súa chegada a Santiago de Compostela o vindeiro 1 de xullo.
A súa estadía en Barbanza Arousa correspóndese cunha das etapas finais desta peregrinación xacobea, que está permitindo aos seus participantes coñecer de primeira man parte do patrimonio, cultura e gastronomía do destino.
