Este xoves 19 de xuño pola mañá a veciñanza de Ribeira concentrouse diante das dependencias da Consellaría de Sanidade, en Santiago, para esixir ao SERGAS “a dotación inmediata do persoal sanitario necesario para garantir unha atención digna á cidadanía, especialmente nun momento no que se aproxima o verán e se incrementa de xeito notábel a poboación e a demanda asistencial”, reclamaron. Na mobilización compareceron varios militantes nacionalistas e a edil do BNG en Ribeira, Cruz Rivadulla, estiveron presentes na mobilización, apoiando esta reivindicación e denunciando, nas súas palabras, “a situación límite á que a Xunta do PP está sometendo á sanidade pública, ao non cubrir prazas vacantes, nin substitucións por vacacións, baixas ou permisos”.
“Non é de recibo que nun concello como Ribeira, que no verán multiplica a súa poboación, non só non se incremente o persoal sanitario, senón que se vexa reducido”, sinalaron desde o BNG, engadindo que “esta falta de previsión e planificación por parte da Consellería de Sanidade está a provocar un deterioro grave da atención sanitaria, obrigando aos centros a atender un volume moi superior de pacientes con menos efectivos, o que satura os PACs e os servizos de urxencias hospitalarias”.
Desde o BNG lembraron “que esta situación non é nova, senón que se repite dende o inverno e as listas de agarda non fan máis que esperar chegando a ter que agardar até dúas semanas para que te poida atender o médico de cabeceira”.
Para os nacionalistas, “o Goberno galego non está adoptando medidas e vota en contra das que propoñen grupos como o BNG para aprobar un plan de choque en Atención Primaria dotado de 200 millóns de euros”.
O Bloque reclamou “a activación dun plan de continxencia real, que garanta a cobertura de todas as prazas, o reforzo dos centros de saúde nas zonas con incremento de poboación estacional, e a recuperación de servizos básicos como pediatría, quendas de tarde ou atención non urxente”.
