Ribeira viviu este domingo unha xornada festiva co Día da Bici, un evento organizado pola Concellería de Deportes en colaboración co Club Os Saltamontes, a Asociación de Veciños de Carreira, a Policía Local, GAEM e Protección Civil.
Máis de 400 persoas de todas as idades sumáronse ao percorrido urbano de 5 km, que arrincou ás 11:15 horas tras a recollida de dorsais. A ruta atravesou a Avenida Rosalía de Castro, o barrio das Avesadas e rúas céntricas como a Rúa de Galicia, Romero Ortiz ou Malecón Carolinas, regresando despois ao punto de saída.
Ao finalizar, os participantes foron recibidos cun avituallamento gratuíto e un sorteo de premios, que incluíu bicicletas, accesorios e material ciclista, doados por Sport BiKe e Dalle Pedal. A festa completouse con inchables para o desfrute dos máis cativos.
O alcalde, Luís Pérez Barral, e o concelleiro de Deportes, Xabier Vídal, destacaron a “alta participación e o ambiente festivo”, así como a importancia de promover a mobilidade saudable, educativa, segura e respectuosa co medio ambiente. Vidal subliñou, ademais, a satisfacción “polo número de nenos e nenas que participaron junto coas súas familias”, reforzando así os valores do uso da bicicleta na sociedade.
