Este domingo 15 de xuño, Ribeira vai reivindicar a mobilidade limpa e saudábel coa celebración do Día da Bici, organizada pola Concellería de Deportes do Concello de Ribeira, en colaboración co Club Os Saltamontes e Asociación de Veciños de Carreira. Trátase, en palabras do Concello, “dunha actividade lúdico-recreativa, aberta a persoas de tódalas idades, coa cal téntase fomentar e reivindicar o uso da bicicleta”.
A actividade vaise concentrar na praza de España en Santa Uxía, a retirada de dorsais será a partir das 10:00 h da mañá para dar paso a saída ás 11:00 h. que fará un percorrido urbano ao redor de 5 quilómetros.
Haberá inchábeis para os nenos e nenas, un avituallamento e sorteos.
Será obrigatorio o uso de casco e levar as bicicletas nas mellores condicións posíbeis.
O concelleiro de Deportes, Xabier Vidal, falou os días pasados do obxectivo desta actividade: “Que os máis novos se vaian familiarizando con este medio de transporte, que é tamén unha aposta pola saúde, a practica deportiva, o medio ambiente e pola mobilidade sostíbel”.
Para finalizar, o concelleiro agradeceu a implicación no evento do Club Saltamontes, ao GAEM e a Policía Local e ás tendas Sport BiKe e Dalle ao Pedal pola súa colaboración, ademais de “animar á veciñanza a participar nesta festa da bici”.
Por outra banda Juan Santos do Club Saltamontes recomendou seguir as normas do evento ”para gozar do día coa máxima seguridade”.
Para facer a inscrición, no formulario web dispoñíbel ou entrando na web do concello, ribeira.gal.
