Este venres 6 de xuño o concello de Outes acolle a partir das 10.00 horas unha xornada paticipativa de elaboración de novos refuxios para escaravellos autóctonos no río Tins. A actividade dará comezo na Casa da Cultura do Concello de Outes cunha charla explicativa impartida por especialistas na materia e acto seguido instalaranse os acubillos para insectos na beira do río, co obxectivo de” favorecer a biosiversidade da contorna ambiental do Tins”.
O obradoiro, que se desenvolve durante toda a mañá deste venres, é aberto e colaborativo. Encárase na actividade ambiental e voluntaria do Proxecto Renatur_Outes. Acompañarase da charla explicativa Visitando un refuxio de escaravellos por parte de Jonatan Rodríguez da área de Ecoloxía da USC. A actividade é de balde e apta para que aprendan rapaces e maiores.
Liderado polo Concello de Outes, Renatur_Outes conta coa participación de investigadores das tres universidades públicas galegas: Universidade da Coruña, Universidade de Santiago de Compostela, Universidade de Vigo, a Fundación Montescola e o CEER Centro Estudos Eurorrexionais Galicia-Norte de Portugal, co apoio da Fundación Biodiversidad do Ministerio para la Transición Ecológica y el Reto Demográfico (#MITECO) no marco do Plan de Recuperación, Transformación e Resiliencia (#ProyectosPRTR), financiado pola Unión Europea – #NextGenerationEU.
