O vindeiro mércores 18 de xuño, o Centro Social do Concello de Padrón acollerá unha xornada participativa dirixida a persoas autónomas, emprendedoras e profesionais que realizan trámites frecuentes coa Administración Xeral do Estado. O obxectivo principal é “identificar e analizar as principais cargas administrativas que dificultan o exercicio das actividades económicas e profesionais, coa finalidade de promover medidas de simplificación e mellora da relación coa administración”, segundo informou o Concello.
A sesión comezará ás 16:30 horas coa intervención do alcalde Anxo Arca. Seguidamente intervirán representantes institucionais como Eduardo Abad Sabaris, presidente de UPTA España; Inés Mazuela Rosado, responsable institucional e xurídica de UPTA España; así como representantes da Secretaría de Estado de Función Pública como Luisa Berrio Martín-Retortillo (Subdirectora Xeral de Organización e Procedementos) e Javier Barace Morales (Coordinador de Área).
Ás 17:00 h presentarase o Método Simplificado de Medición de Cargas Administrativas a cargo de Carmen García Sánchez, técnica de UPTA España, seguido dun coloquio aberto onde as persoas asistentes poderán expoñer as súas experiencias, detectar trabas e propoñer melloras para facer os procedementos máis áxiles e eficientes.
O aforo é limitado, polo que as persoas que desexen participar deberán inscribirse previamente a través do correo eva.fuente@upta.es ou no teléfono 91 539 81 26.
Esta xornada, organizada por UPTA España en colaboración co Concello de Padrón, enmárcase dentro das accións para favorecer o desenvolvemento económico local, facilitando o día a día das persoas que sustentan o tecido produtivo da comarca.
