A Asociación de Armadores de Ribeira compartiu un comunicado no que expresan o seu malestar e a súa preocupación polo funcionamento do alumeado público na contorna do porto de Santa Uxía. Segundo fan saber, a zona das chabolas portuarias e a contorna do campo das redes (onde se estenden e arranxan as redes e outros aparellos dos barcos pesqueiros) levan sen luz dende hai uns quince días. Ante esta situación, sinalan, “puxémonos en contacto con Portos de Galicia, informando á entidade dependente da Xunta da situación e contéstannos que iso é responsabilidade da Lonxa de Ribeira, por conseguinte, puxémonos en contacto cos responsables da Lonxa, onde nos indican que eles non son os responsábeis, que iso é cousa de Portos de Galicia, que lles reclamemos a eles”. A Asociación de Armadores quéixanse no comunicado do surrealista da situación e das trabas burocráticas que poñen as administracións á cidadanía para entorpecer o arranxo de servizos que deberan estar en bo funcionamento.
“Por tanto”, engaden, “xa nos tememos que este asunto de competencias (ou incompetencias) vainos a levar, sabe deus canto tempo, a ter que seguir a escuras”. Tamén indican que “os propios camioneiros xa se están queixando porque que si hasta agora, con luz e todo, o problema era que lles roubasen o gasóleo ou as baterías, agora ca nocturnidade e aleivosía, xa lles levarán directamente os camións”.
