O portavoz de Pesca do Grupo Socialista, Carlos López Font, esixiu á Xunta este martes 3 de xuño que “poña en marcha un plan de choque a curto, medio e longo prazo co obxectivo de garantir a continuidade e o relevo xeracional da actividade marisqueira”. O responsábel socialista presentou unha pregunta oral na Comisión de Pesca para reclamar ao Goberno galego que “tome en serio a caída da produtividade marisqueira e a perda de empregos”. Amais, esixiu a posta en marcha “de forma intensa e efectiva” dunha serie de programas de formación e sensibilización, plans de sostibilidade, liñas de apoio á innovación e campañas de educación e visibilización dirixidas a “dignificar o oficio e amosalo como alternativa profesional viábel”. Sinalou que o sector do marisqueo galego se atopa nunha “situación crítica” pola caída da produtividade e a falla de relevo xeracional, que require de “políticas integrais que melloren as condicións do sector, faciliten o acceso ás novas xeracións e promovan unha imaxe renovada deste traballo tradicional”.
Font advertiu do momento “crítico” que atravesa o marisque, con datos como, a modo de exemplo, un descenso do 93 % na extracción de berberecho na ría de Arousa, un 86 % menos de ameixa “e 45 millóns de euros menos de facturación” durante o 2024. A iso únese o avellentamento, cunha media de idade superior aos 50 anos entre os e as profesionais. “En algunhas zonas hai unha nula presenza de menores de 30 anos”, apuntou.
Carlos López Font dixo que a Xunta está a demorar a tramitación da reversión de terreos portuarios sen uso aos concellos afectados. En resposta á comparecencia do presidente de Portos de Galicia, felicitouse de que o ente iniciase conversas coa FEGAMP despois de que o Grupo Socialista preguntase no pleno do Parlamento pola situación deste asunto, “cando pasaran catro anos sen que houbese ningunha comunicación cos concellos”.
O deputado reclamou que se manteña o diálogo cos municipios e se avance “con dilixencia” para “que as entidades locais poidan dispor plenamente duns espazos que, de facto, xa non están afectados por ningunha actividade portuaria”.
