As Tareixas, grupo de música familiar que colleitou importantes éxitos grazas á súa participación no certame Quero Cantar da Deputación da Coruña, estará este mes no concello de Boiro, o 21 de xuño, presentando o seu novo disco.
As Tareixas é un grupo que botou a andar en decembro de 2023. Fíxoo tras a operación de cadeira da súa avoa Martina, cuxo relato foi tan intenso que acabou desembocando nunha canción coa que gañaron o segundo premio no concurso Quero Cantar, na categoría de mellor canción infantil. Tamén actuaron na Gala Final no Teatro Colón da Coruña. Esta actuación celebrouse a finais de abril 2024 e, días despois, xa os estaban chamando para facer concertos. Toda unha sorpresa que fixo que, José Manuel, o pai compositor, se puxese a completar varios temas que xa tiña feitos e a armar outros arredor do mundo familiar musical e Román (clarinete e voz) e Omara (trompeta e voz), con especial fincapé nas relacións humanas e na relación coa natureza.
En dous meses xa tiñan un repertorio de sesenta minutos. Todo cancións orixinais, en galego, e sobre temática infantil, aínda que do gusto de todos os públicos: letras profundas, arranxos coidados e interpretacións cheas de emoción son o selo do grupo.
Logo desta inesperada xira de verán no Nadal 24-25 As Tareixas metéronse no estudio a gravar o traballo discográfico Santo mandil, que estarán presentando todo ao longo deste verán 2025.
Concertos de presentación do disco
Vimianzo 11 Xuño
Vilasantar 19 Xuño
Boiro 21 Xuño
Redondela 18 Xullo
Moaña 19 Setembro
