O Concello de Ribeira, a través do concelleiro de novas tecnoloxías, Francisco Suárez-Puerta, informou á cidadanía da detección de perfís falsos na rede social Facebook que estarían a suplantar a identidade de servizos de transporte público en distintos concellos galegos. Esta información foi trasladada ao Concello polo Servizo de Vixilancia Dixital, que advirte de que estes perfís están a difundir mensaxes e imaxes cunha suposta oferta dunha tarxeta de transporte por 2 €, coa promesa de realizar viaxes ilimitadas durante seis meses.
Francisco Suárez-Puerta engadiu que “estes anuncios inclúen ligazóns maliciosas que supoñen un risco para a seguridade dos usuarios” e que “dende o Concello de Ribeira queremos poñer esta situación en coñecemento da veciñanza e lembramos a importancia de contrastar sempre a información a través de fontes oficiais”.
Así mesmo, engadiu, ” recomendamos consultar unicamente as canles institucionais e os procedementos lexítimos establecidos polas administracións e empresas responsábeis do servizo de transporte. A prevención e a concienciación cidadá son, nestes casos, a mellor defensa fronte a este tipo de fraudes dixitais”.
