O Concello de Rianxo vén de recibir unha subvención da Xunta de Galicia, por importe de 33.765€, para a mellora do Cuartel Vello. A subvención enmárcase dentro do programa de axudas da Dirección Xeral de Administración Local para a optimización das infraestruturas e equipamentos vinculados á prestación de servizos municipais.
Segundo informaron fontes do Concello, as actuacións que se levarán a cabo consistirán sobre todo na renovación dos baños situados no primeiro andar “garantindo a accesibilidade aos mesmos, a renovación das portas do andar baixo e a disposición dun novo pavimento”.
O Cuartel Vello é un inmóbel do centro histórico de Rianxo, na praza de Castelao, chamado así por ter sido durante moitos anos o cuartel da Garda Civil, aínda que logo foi o primeiro instituto da vila. A día de hoxe está destinado a equipamento sociocultural multiusos.
