A Consellería de Economía e Industria vén de conceder unha subvención por importe de 109.625,58 euros ao Concello de Boiro co fin de habilitar e mellorar as infraestruturas dos parques empresariais da Comunidade Autónoma de Galicia.
Na práctica esta axuda traducirase nun proxecto de mellora de infraestruturas no parque empresarial de Espiñeira para acondicionar vías que se atopan en terreo natural sen asfaltar. Por unha banda vaise acondicionar un camiño de acceso dende a vía principal de entrada ao polígono até unha parcela municipal; outra vía de acceso dende o parque empresarial a unha pista forestal; o pavimentado de dous aparcadoiros públicos que se atopan con fresado; vaise executar o pintado do firme das vía da Fase II e vaise acondicionar un novo aparcamento público.
Estas accións suporán a continuación das melloras nas infraestruturas viarias no interior do parque empresarial de Espiñeira, dotando a contorna do polígono de maior seguridade e mellores servizos atendendo ao crecemento de fluxo de persoas que experimentou nos últimos anos tras a implantación de novas grandes industrias.
O parque empresarial de Espiñeira comezou a súa andaina no ano 1998 e na actualidade conta cunha superficie duns 324.500 metros cadrados, co terreo industrial completamente esgotado e máis do 90% das parcelas xa ocupadas. “Levamos a cabo melloras nas infraestruturas do parque empresarial para dar servizo ás industrias que se atopan aloxadas á vez que seguimos traballando co obxectivo da ampliación do polígono para atender a demanda de solo industrial que temos na actualidade”, afirmou o alcalde.
