A comarca da Ría de Muros e Noia, xunto coa do Barbanza, reuniuse nun acto de homenaxe á figura de Ánxela Franco, quen faleceu no ano 2019. Natural de Porto do Son, Franco exerceu como deputada provincial do BNG na área de Benestar Social e Igualdade da Deputación da Coruña e como concelleira no seu concello natal, deixando unha profunda pegada tanto no ámbito político como social.
O emotivo acto comezou cunha ofrenda floral ao pé dunha gran imaxe da homenaxeada, acompañada da interpretación do himno galego. Posteriormente, tomaron a palabra compañeiras e compañeiros de partido, como o portavoz municipal no Porto do Son, Balbino Montemuiño; a responsable comarcal e deputada provincial, Sol Agra; e a deputada no Parlamento galego, Rosana Pérez.
Numerosos militantes, simpatizantes, amizades, veciñas e familiares acudiron á cita para lembrar a figura dunha muller que loitou con firmeza pola xustiza social e a igualdade desde o nacionalismo galego.
Desde o BNG quixeron destacar “o grande respecto e admiración polo valioso legado político da compañeira Ánxela Franco”, poñendo en valor a súa traxectoria como exemplo de compromiso coa súa terra e coa defensa dos dereitos sociais.
