A primeira edición do programa Di-Versos, que xunta cancións feitas nos colexios de Ribeira para facer oír a diversidade a través dun gran obradoiro de composicións de cancións, chegou este mércores 18 de xuño á súa culminación no Auditorio de Santa Uxía. O programa, promovido polo departamento de Servizos Sociais do Concello e levada a cabo polo compositor local, Fernando Pérez, celebrou a súa gala final cunha chuvia de premios.
A prol da diversidade
Neste programa propúxose a participación dunha aula de terceiro ciclo de cada centro educativo de ensino primario do concello de Ribeira, na que os alumnos e alumnas compoñen, interpretan e gravan unha canción, relativa a calquera tipo de diversidade, sexa cultural ou natural, promovendo valores como xustiza, liberdade, igualdade, equidade, comprensión, respecto e/ou apoio mutuo.
Cada unha das composicións foron inseridas nuns vídeos subtitulados que se atopan na web municipal.
As actividades realizáronse principalmente no primeiro trimestre do ano 2025 e foron orientadas especialmente a alumnos/as do 3o ciclo de primaria, sendo decisión do centro a elección do grupo/aula a participar.
Participaron na nova iniciativa o CEIP Pluriligüe Frións, o CEIP Heroínas de Sálvora de Aguiño, o CEIP de Olveira, o CEIP Plurilingüe O Grupo de Ribeira, o CEP Plurilingüe de Carreira, o CEIP Pluriligüe de Artes, o Colexio Galaxia de Ribeira, o Colexio A Milagrosa de Oleiros, o Colexio Sagrado Corazón de Castiñeiras e o Colexio Bayón de Ribeira. Participaron máis de 250 rapaces e rapazas do 3ª ciclo de primaria.
No día de hoxe celebrouse esta gala co obxectivo de xuntar a tódolos participantes e entregarlles uns trofeos e diplomas pola súa participación e dedicación desta nova iniciativa centrada en promoción os valores establecidos na Declaración Universal de Dereitos Humanos.
A gala foi conducida por Santi Páramo (impulsor da iniciativa) xunto con Francisca Vidal, coordinadora dos Servizos Sociais e acudiron o rexedor ribeirense, Luís Pérez, o segundo tenente de alcalde, Vicente Mariño, a concelleira de Educación, Cruz Rivadulla, alumnos e alumnas dos centros e profesorado.
Na cita as e os participantes puideron visionar os vídeos onde se reproduciron as cancións creadas por elas e eles, e ao rematar os bloques de vídeos procedeuse á entrega de premios na que CPR Galaxia resultou premiado ao Talento Diverso; o CEIP Plurilingüe O Grupo, premio Ritmo de Cores; o CPR Plurilingüe La Milagrosa (Oleiros), premio Notas de Igualdade; o CEIP Plurilingüe de Frións, premio Escena de Todos; o CPR Sagrado Corazón de Jesús (Castiñeiras), premio Harmonía en Movemento; o CPR Bayón, premio Sorrisos con Identidade; o CEIP Heroínas de Salvora (Aguiño), premio Voces que Unen; o CEP Plurilingüe Carreira, premio Pasos con Corazón e o CEIP Plurilingüe de Artes co premio Luces de Inclusión.
Alcalde, tenente de alcalde e concelleira (Luís Pérez Barral, Vicente Mariño e Cruz Rivadulla) repartiron os trofeos e diplomas desta gala na que se mostraron agradecidos aparte de sorprendidos pola gran calidade de tódalas propostas aportadas polos colexios apoiadas polo equipo técnico e o músico Fernando Pérez.
Na gala tamén se destacou o XX aniversario da Escola Infantil Municipal de Ribeira adscrita ao departamento de Servizos Sociais do Concello que tamén participou en Di-versos coa súa canción e recibiu un recoñecemento pola súa traxectoria que recolleu directora pedagóxica da escola, Olalla Ouviña.
