O Concello de Muros publicou estes días as normas relativas aos lumiños e cacharelas da vindeira festividade de San Xoán, no serán e noite do 23 de xuño. Segundo se fai saber no comunicado, as persoas, asociacións ou comunidades que desexen realizar unha cacharela deberán presentar a solicitude no Concello de Muros antes das 14:00 horas do día 19 de xuño cumprimentando o modelo de solicitude.
Ademais, indícase que as laradas ou cacharelas situaranse en lugares seguros, de tal xeito que non exista perigo de propagación accidental ás vivendas, instalacións ou terreos próximos.
Por outra banda, non se permite a utilización de líquidos inflamábeis nin queimar produtos contaminantes. Tampouco se poderán queimar residuos ou restos domésticos, forestais ou agrícolas.
As laradas deben estar baixo vixilancia en todo momento e os responsábeis deberán asegurarse de que o lume queda completamente apagado.
“Mediante estas normas queremos garantir a seguridade das persoas, facendo compatíbel a celebración dunha festa tradicional coa seguridade de todos”, sinalaron dende o Concello, engadindo que a información está dispoñíbel na sede electrónica municipal.
