O Concello de Noia, Abanca e Afundación presentaron a nova exposición do proxecto Corrente cultural, a mostra de rúa Comedy Wildlife, cuxos paneis pódense contemplar xa na alameda noiesa. O acto de inauguración celebrouse este martes 10 de xuño na praza do Concello e contou coa asistencia da concelleira de Economía e Facenda, Laura Salgado, o concelleiro de Turismo e Cultura, Pepe Pérez, o coordinador institucional de Abanca na Coruña, José Manuel Vilariño, o director da oficina de Abanca en Noia, Rafael Cuña; a subdirectora da oficina de Abanca en Noia, Irene Gómez; e a coordinadora adxunta da Área de Cultura de Afundación, Paloma Vela. A mostra ficará nas rúas de Noia ata o vindeiro 6 de xullo.
Esta colaboración é parte do proxecto Corrente cultural, que considera a arte como un instrumento clave para fomentar o coñecemento e o desenvolvemento colectivo.
As imaxes que articulan Comedy Wildlife resultaron distinguidas entre 2015 e 2022 como as mellores instantáneas de animais feitas en clave de diversión e humor polo galardón The Comedy Wildlife Photography Awards. Agora chega na súa versión de rúa tras abarrotar nos últimos dous anos museos e centros de exposicións dos Países Baixos, Inglaterra, Portugal ou Canadá, e despois do seu exitoso paso polos centros de Afundación en Galicia. Sobre a base do seu compromiso coa implicación social e o coidado do medio ambiente, a Obra Social de Abanca presenta esta nova proposta expositiva no marco dunha programación variada, dinámica e innovadora para todos os públicos e de amplo alcance xeográfico.
Comedy Wildlife é unha exposición que cativa a toda a familia ao utilizar o humor e a sorpresa como unha forma efectiva de involucrar ao público e facer unha chamada de atención sobre a urxencia da crise climática e a destrución da natureza mediante a empatía que sentimos con estas imaxes. Así, as 60 instantáneas seleccionadas que se presentan amosan, nas posicións e momentos máis divertidos, a animais como tartarugas, mapaches, osos ou pingüíns.
Asegura o co.fundador dos premios The Comedy Wildlife, o fotógrafo especializado na natureza Paul Joynson-Hicks, que “as cuestións de conservación e sostibilidade da vida silvestre están a gañar impulso a nivel mundial, pero as mensaxes e as imaxes tenden a ser negativas, deprimentes e enervantes”. E que por iso se animou, xunto aos fotógrafos de natureza Tom Sullam e Michelle Wood, a crear estes galardóns. Desde 2015, premian as imaxes máis divertidas de animais tomadas nun mundo “extraordinariamente belo e interconectado”.
