O médico Santiago Méndez Vites faleceu onte aos 91 anos de idade, deixando unha profunda pegada tanto no ámbito sanitario como na vida social e cultural de Ribeira, vila que consideraba seu fogar desde hai décadas. O seu fillo, o avogado Lito Méndez, definiuno como “un gran intelectual, un médico por vocación e un namorado da súa Palmeira”, destacando tamén o seu exemplo de entrega ao traballo e á familia.
Natural de Santiago de Compostela, foi un verán, convidado ás festas de Ribeira, cando coñeceu no Círculo Mercantil a María del Carmen Torres Colomer, que sería a súa compañeira de vida durante máis de medio século. Santiago coidouna con devoción ata hai apenas un mes, cando unha caída precipitou o seu deterioro e posterior falecemento.
Estudou Medicina en Santiago de Compostela e especializouse en Xinecoloxía e Obstetricia en Alemaña, onde naceu o seu primeiro fillo. O falecemento do seu pai aos 53 anos levouno a regresar a Galicia, establecéndose definitivamente en Ribeira. Alí desenvolveu unha longa carreira tanto na clínica privada como na sanidade pública, prestando servizo no ambulatorio e no hospital comarcal do Barbanza.
Comprometido tamén coa vida pública, Santiago Méndez foi membro da primeira corporación democrática do Concello de Ribeira. Apaixonado pola lectura, posuía unha extensa biblioteca persoal que cultivou ao longo de toda a súa vida.
Segundo se informa na esquela familiar, os seus restos foron velados no Tanatorio Crematorio do Barbanza – Xarás, ata as 23:00 horas deste sábado, momento no que será incinerado na intimidade familiar. O funeral polo seu eterno descanso celebrarase o martes 1 de xullo ás 20:30 horas na Igrexa Parroquial de Santa Uxía de Ribeira.
Deixa á súa esposa, María del Carmen Torres Colomer; aos seus fillos, Santiago, Manuel, María Dolores, María del Carmen e Luis; así como numerosos netos, bisnetos e familiares, que agradecen os xestos de afecto recibidos nestes momentos de dor.
