O alcalde de Porto do Son, Luis Oujo, acompañado polo orientador laboral municipal, José Manuel Pazó, estiveron presentes esta semana no acto de clausura do Curso de Competencias Dixitais, formación gratuíta destinada a fortalecer o apoderamento, a autonomía e a empregabilidade da veciñanza.
O curso, no que colaborou o Concello, foi dirixido á cidadanía inscrita como demandante de emprego no Servizo Público de Emprego. Entregouse un título oficial acreditativo a todas as persoas que remataron este curso (20 persoas), que contou con 200 horas de formación. As sesións desenvolvéronse na Biblioteca Municipal en horario de mañá. Todas as persoas participantes recibiron o título oficial acreditativo e un ordenador portátil de agasallo. Os contidos foron impartidos polos profesionais de Ara Formación e Beproject Consultores, a través do programa Dixigalízate (iniciativa de adestramento tecnolóxico para as provincias da Coruña e Lugo, impulsado pola Xunta, a UE e o Goberno central).
