A Sociedade Cooperativa Galega do Mar Santa Uxía de Ribeira-OPP83 desprazouse ata Salimat para presentar ao público as delicias atlánticas capturadas pola súa frota asociada no litoral galego. O resultado foi un notábel éxito de participación e repercusión, con aforo completo rexistrado durante a sesión culinaria que, segundo fixo saber a Cooperativa, “gozou de gran aceptación entre o público”.
A demostración, que se desenvolveu na caseta da Consellería do Mar da Xunta de Galicia no marco da campaña Galicia sabe aMar, contou coa participación da xerente da OPP83, María José Casais, que destacou o traballo da frota asociada na captura de peixe fresco e de proximidade mediante unha actividade pesqueira sustentábel. Casais estivo acompañada polo segundo tenente alcalde de Ribeira e concelleiro delegado de Turismo, Francisco Suárez-Puerta, e o concelleiro delegado de Mar, Fernando Abraldes, que mostraron desta forma o seu apoio á promoción de produtos pesqueiros da Sociedade Cooperativa Galega do Mar Santa Uxía de Ribeira.
Grazas á boa man da chef Criselda Iglesias, do Espazo Gastronómico Remollo, as elaboracións non defraudaron aos presentes que puideron deleitarse co sabor e a frescura da sardiña, xurelo e lirio de Ribeira, produtos maridados cunha axeitada selección de viños de Ribeira Sacra. A cociñeira destacou a calidade dos produtos pesqueiros achegados pola OPP83 e presentou unha sorprendente mestura de ingredientes que encandearon ao público: ensalada de xurelo curado marinado en aceite de oliva, sardiña e verduras en tempura con maionesa de codium, e Lirio de Ribeira asado encurtido de verduriñas.
A Cooperativa destacou que as tres elaboracións “deixaron un moi bo sabor de boca entre os comensais”, que tamén puideron descubrir calidades nutricionais destes peixes e trucos de cociña.
Esta acción promocional forma parte do PPyC 2025 da OPP83 de Ribeira, co-financiado pola Xunta de Galicia e o FEMPA. Con esta iniciativa, a Organización de Produtores Pesqueiros ten o obxectivo de fomentar o consumo de peixe entre a poboación, promocionar os produtos pesqueiros da súa frota asociada e fortalecer a presenza da súa marca, Lirio de Ribeira, entre o público.
O Lirio de Ribeira, marca rexistrada en 2022 e recoñecida pola Oficina Española de Patentes e Marcas é unha especie pesqueira de excelente calidade que se captura seguindo estritos parámetros de calidade e frescura chegando a porto en menos de 7 horas desde augas galegas.
