A concelleira de Cultura, María Outeiral, participou na presentación do Serán de Abanqueiro xunto con María Dolores Dieste, membro da nova directiva da Comisión Virxe do Carme de Abanqueiro. Este sábado 21 terá lugar un serán que sirva como carta de presentación da nova asociación.
“Xuntámonos un grupo de xente para retomar a festa do Carme de Abanqueiro que levaba varios anos xa sen celebrarse e estamos xa a traballar na festa que terá lugar o primeiro domingo de setembro”, afirmou Maria Dolores Dieste. Para darse a coñecer este sábado 21 de xuño organizan un serán nas inmediacións do Centro Social de Abanqueiro.
O serán de Abanqueiro dará comezo ás 20.30 horas con musica tradicional e degustación de paella e contará con DJ Jalaiko para rematar o día. Ademais o programa inclúe unha homenaxe ao Abanqueiro SD polo seu ascenso de categoría nesta tempada.
A concelleira de Cultura, María Outeiral, agradeceu á nova comisión pola súa implicación para “retomar unha das festas tradicionais da parroquia de Abanqueiro” e mostrou o compromiso do Concello de Boiro en apoiar estas iniciativas da veciñanza ademais de convidar á xente da parroquia e de Boiro a que se achegue este sábado a Abanqueiro.
