No marco dos actos do XVII Encontro de Embarcacións Tradicionais de Galicia que se van a celebrar do 17 ao 20 de xullo en Ribeira, presentouse este 4 e xuño unha charla que terá lugar o vindeiro xoves 10 de xuño e que leva por título A vela: tradición, deporte e paixón e será impartida polo veciño de Ribeira, Juan Lustres Lampón na sala polivalente do Auditorio Municipal.
Na presentación da charla participaron a concelleira de Cultura, Antía Alberte, o propio relator, Juan Lustres e David Fernández, representante da Confraría da Dorna.
A concelleira subliñou que ”facendo homenaxe e honra a ese encontro de embarcacións, estamos facendo ao longo do ano actividades paralelas para darlle un pouquiño de pulo a este gran evento que imos ter no verán”.
Antía Alberte presentou a Juan Lustres coma un veciño máis de Ribeira “que estivo anos fóra como bo galego, viaxou por moitas partes do mundo e ten moita experiencia co tema da vela, participou en numerosas regatas por diferentes meridianos do planeta, e aparte de ter esa experiencia e bo saber, tamén ten paixón por este deporte”.
Lustres adiantou que vai ser unha charla sinxela onde se mostrarán aos asistentes os conceptos básicos e os mecanismos para navegar a vela, “ideal para as persoas que queiran iniciarse neste mundo”. Aparte de ilustrar sobre os
conceptos básicos da navegación a vela, Juan Lustres viaxará até os comezos da vela e a navegación de cabotaxe, contextualizando sobre as embarcacións propias da ría de Arousa.
Dende a concellería de Cultura e a Confraría da Dorna animan á veciñanza a embarcarse na sala polivalente o vindeiro xoves 10 de xuño.
