A Aula Sostible do Freixo (Outes) vai organizar unha actividade de voluntariado para retirar lixo da praia de Broña, no concello de Outes. A xornada colectiva de limpeza celebrarase este xoves 5 de xuño no devandito areal, onde serán benvidas todas as persoas que se acheguen a colaborar. Trátase dunha xornada organizada desde a Aula Sostible do Freixo, a Asociación de Mulleres do Sector Pesqueiro SEO Fisterra-Ría de Muros Noia, a Asociación Misela e máis o Concello de Outes, coa colaboración da asociación ambiental Noia Limpa e as entidades inclusivas ADISBISMUR e A Creba Saúde Mental. A xeira de traballo desenvolverase entre as 11.00 e as 13.00 horas. As persoas interesadas en participar ou en obter máis información sobre a xornada de voluntariado poden chamar ao seguinte número de teléfono: 627 570 949.
