O Concello de Muros está a dar novos avances para blindar nos areais locais a protección da píllara das dunas (Charadrius alexandrinus). Segundo confirmaron no Consistorio, parte dos esforzos estanse a focalizar na praia da Area Maior, onde xa hai a día de hoxe catro niños da devandita ave costeira, especie protexida en risco de desaparición, especialmente vulnerábel pola presión humana na nosa costa. O Concello confirmou que un dos niños está protexido con gaiola e os outros tres atópanse nas dunas. Indican tamén que “para preservar esta fauna protexida”, cómpre lembrar que non está permitido o acceso ás dunas.
“Temos un ecosistema natural privilexiado en Muros, un tesouro que temos que coidar”, informou recentemente a alcaldesa, María Lago, responsábel tamén da área de Medio Ambiente municipal. Tamén recordou que con motivo do Día Mundial do Medio Ambiente (o pasado xoves 5 de xuño), publicouse a aprobación definitiva da nova ordenanza de praias do Concello de Muros, unha folla de ruta para mellorar a saúde das persoas e a conservación do noso entorno natural.
