O Conservatorio Profesional Municipal de Ribeira (Conservatorio Enrique Paisal) acolleu este venres a presentación do concerto de música antiga
que se celebrará este sábado día 21 en Oleiros, na igrexa de San Martiño, a cargo da orquestra de cámara Ensembre Hotteterre con entrada de balde.
A presentación contou co trío de músicos integrantes da agrupación, a concelleira de Educación, Cruz Rivadulla e Ánxela Vidal, profesora do Conservatorio de Música de Ribeira e promotora do Seminario de Música Antiga e Gaita de Fol.
Cruz Rivadulla informou que o concerto de mañá será ás 19:00 h e que este concerto “vén sendo o colofón final do Seminario de Música Antiga do conservatorio”. Rivadulla animou a veciñanza que lle guste a música clásica que “teñen unha oportunidade de ver un concerto inédito de música antiga nunha das capelas mas senlleiras do municipio, todo un luxo”.
Por outra banda, Ánxela Vidal sinalou que o que se presenta é o concerto de clausura do curso de música antiga “no que levamos dúas edicións
organizando dende o conservatorio”. O concerto está organizado polo departamento de instrumentos antigos do que Ánxela é a responsábel.
No caso do seminario en concreto, Vidal significou que “a gaita de fol é un instrumento que normalmente o asociamos á música tradicional e popular;
sobre todo na nosa terra, pero neste caso, neste contexto, queremos tratalo coma un instrumento erudito da música culta porque realmente ten un
transcurso histórico moi grande que comeza dende a idade media e que realmente ten un repertorio que socialmente é descoñecido, entón parécenos importante impulsar o recoñecemento deste repertorio”.
Mañá sábado ás 19:00 horas os amantes da música clásica teñen unha cita en Oleiros.
