A agrupación UCIN Galicia lanzou un comunicado crítico co Concello de Boiro por, nas súas palabras, “falta de dedicación do Goberno local ante os problemas que expoñen moitos veciños e veciñas da localidade”. No comunicado UCIN pregúntase pola presenza de socorristas nas praias de Boiro: “Xa estamos en xuño e o Executivo local segue sen persoal de salvamento nas praias, ou é que agardamos a que haxa unha traxedia para actuar?”. Sinalan que “Boiro adoitaba ter varias praias con bandeira azul, o que convertía o concello nun destino atractivo para turistas e locais”. Porén, sinalan, “en 2025, o concello non obtivo ningún distintivo desta índole, malia ser unha das localidades galegas con maior número de praias con este recoñecemento no pasado, pero as esixencias para a concesión da bandeira azul fixeron que Boiro non cumpra os requisitos este ano”.
UCIN Galicia tamén critica o estado no que se atopan os parques infantís, que, segundo sinalan, “están abandonados” e, engaden: “A maioría presentan unha deterioración permanente e moitos son directamente perigosos, mesmo non teñen previsto ningún plan de mantemento para emendar as deficiencias”.
José Luis Calo, responsábel de UCIN Galicia, sinala que “unha institución como o Concello de Boiro debería ter un alcalde centrado en resolver os problemas dos cidadáns e quedar á marxe dos intereses partidistas, cousa que parece non haber interiorizado o rexedor, que leva en campaña desde que chegou á alcaldía”.
