Un operario resultou ferido ao quedarlle atrapada a man nunha máquina dunha fábrica de complementos alimenticios situada no parque empresarial da Espiñeira, en Boiro. Foi liberado por un compañeiro antes da chegada dos equipos de emerxencia.
O 112 Galicia recibiu o aviso pouco antes das 14:45 horas, a través da chamada dun particular que solicitaba asistencia sanitaria para o traballador accidentado.
De inmediato, o Centro Integrado de Atención ás Emerxencias solicitou a intervención dos recursos necesarios: Urxencias Sanitarias de Galicia-061, que mobilizou o seu helicóptero medicalizado con base en Santiago; os Bombeiros e o Servizo Municipal de Protección Civil de Boiro; así como a Garda Civil.
Ao chegar ao lugar, os Bombeiros comprobaron que o operario xa fora liberado, pero presentaba unha lesión grave na man que requiría atención urxente.
Finalmente, o ferido foi trasladado ao Complexo Hospitalario Universitario de Santiago a bordo do helicóptero medicalizado.
