A Secretaría Xeral da Lingua (Consellería de Cultura) tramitou este ano 2.413 matrículas para certificar o nivel de coñecemento en lingua galega. Así o anunciaron o conselleiro de Cultura, José López Campos, e o secretario xeral da Lingua, Valentín García, durante unha visita ás persoas que se examinaron o sábado 10 de maio no Instituto Antonio Fraguas de Santiago de Compostela. Trátase dunhas probas ás que concorreron esta fin de semana na capital galega 1.155 persoas, ás que se suman 224 en Ponferrada e 70 en Madrid, outros dos puntos onde se se poden validar as competencias lingüísticas.
O conselleiro destacou que estes exames “son unha ferramenta fundamental para que a nosa lingua siga a medrar e aumentar o seu prestixio a través do seu uso e o seu coñecemento”. Así, destacou “a importancia de acreditar o dominio do idioma, promovendo a formación e favorecendo o seu emprego en toda sociedade”. Ademais, engadiu, trátase dunha medida dirixida especialmente a “que aquelas persoas non nacidas en Galicia ou que non tiveron este idioma como lingua nai poidan ter a oportunidade de ser parte da comunidade de galegofalantes”.
Ademais do CELGA 4, o 24 de maio terán lugar as probas do nivel 3 que contan con 394 matrículas en Santiago, 92 en Ponferrada e 27 en Madrid. Pola súa banda, examinaranse do CELGA 2 o 25 de maio nas tres sedes un total de 399 persoas (318 en Santiago, 53 en Ponferrada e 28 en Madrid) e do CELGA 1, o 31 de maio, 52 persoas en Santiago.
