A Asociación Ponte…Nas Ondas! vai celebrar esta semana a Foliada das Letras Galego-Portuguesas, baixo o título Agora Cantamos Nós!e contando coa participación de 15 centros educativos de ambas beiras da raia. Será este venres 23 en Santiago de Compostela. O proxecto inclúe a gravación dun audiovisual documental e a publicación dun cancioneiro galego-portugués.
A foliada
Dende PNO! lembran que a literatura oral popular e o cancioneiro tradicional, que se celebran este ano nas Letras Galegas “son un patrimonio compartido con Portugal e cos demais países de lingua portuguesa”. A Foliada das Letras Galego-Portuguesas será deste xeito “unha celebración para que o alumnado comparta un día de festa con outros grupos de escolas galegas e portuguesas”. Ao mesmo tempo, grupos de música profesionais e persoas portadoras da tradición oral intervirán na foliada para que se produza a necesaria transmisión dos seus saberes aos asistentes. Está prevista a asistencia de centros de toda a xeografía galega e do Norte de Portugal estimando a asistencia de 500 mozos e mozas. O Concello de Santiago de Compostela, a Secretaría Xeral da Lingua, o Consello da Cultura Galega e a Deputación de A Coruña colaboran e apoian a celebración desta Foliada e a edición do Cancioneiro galego-portugués.
Valentín García salienta o modelo exemplar de PNO
No acto de presentación participou o secretario xeral de Lingua, quen puxo en valor o labor de Ponte Nas Ondas, considerado un modelo para o mundo ao ter sido incluído no Rexistro de Boas Prácticas da UNESCO polo seu valor pedagóxico e cultural. Tamén fixo fincapé na importancia desta iniciativa pola sensibilización co patrimonio desde a infancia e o achegamento da cultura e lingua ao alumnado de toda a comunidade galega e tamén á do país veciño. Ademais, tamén aproveitou a ocasión para felicitar á organización que este ano celebra tres décadas de traballo.
A foliada Agora Cantamos Nós! xuntará no parque Eugenio Granell de Santiago de Compostela a grupos de música, baile, pandeireteiras e preto de 500 mozos e mozas de centros educativos de Galicia e Portugal. Da provincia da Coruña estarán o instituto de Ames, o instituto Eduardo Pondal, de Ponteceso; o colexio a Ramallosa, de Teo, e o colexio López Ferreiro, o colexio Cardenal Quiroga e o instituto San Clemente, de Santiago de Compostela. Da provincia de Pontevedra participarán o instituto do Barral, de Ponteareas; o colexio Petelos, de Mos; o colexio Carlos Casares e o instituto, de Salvaterra de Miño; o colexio Altamira, de Salceda de Caselas, e o colexio Seis do Nadal e o instituto Alexandre Bóveda, de Vigo. Pola súa banda, de Portugal estarán a escola Nadir Afonso, de Chaves, e a escola Profissional Agrícola, de Celorico de Basto.
