O voceiro do grupo do Partido Popular na Deputación da Coruña, Evaristo Ben, aproveitou o último pleno celebrado este luns 5 de maio para urxir ao Goberno da institución provincial a que actúe canto antes na estrada DP-1103 que une os concellos de Lousame e Boiro ao seu paso polas parroquias de Comparada e Aldarís.
En concreto, os populares denuncian “a existencia de vexetación sobre o propio asfalto da vía”, un feito, dixo Ben, que dificulta o tránsito dos vehículos. “Falamos dunha situación nefasta porque non se trata de que a vexetación invada a estrada desde as cunetas, senón que medra sobre a propia vía”, denunciou.
Neste sentido, o popular lembrou tamén que a DP-1103 sofre o paso de tráfico pesado con destino á planta de tratamento de residuos, un feito, indicou, que agrava a situación actual da estrada.
Segunda fase da DP-4201
Por outra banda, o voceiro do grupo do Partido Popular aproveitou a súa quenda de rogos para reclamar que Deputación da Coruña leve a cabo a segunda fase do proxecto da DP-4201, co que conseguir incrementar o ancho da estrada.
“No seu día realizouse unha primeira fase, pero agora é necesario acometer as obras que dean continuidade á mellora da estrada no seguinte tramo que ten unha lonxitude de 1,4km e, desta forma, incrementar o ancho da vía para mellorar a súa seguridade”, explicou Ben, quen lembrou que o propio presidente da Deputación, Valentín González Formoso, recoñeceu nunha visita a necesidade desta actuación.
