O Concello de Rianxo comunicou que vén de recibir unha subvención da Dirección Xeral de Comercio e Consumo para a dinamización e revitalización do Mercado Municipal. A través desta axuda, por importe de 7.453,60€, abordarase a redacción do proxecto técnico de mellora do mercado para a súa inclusión na rede de mercados excelentes de Galicia.
O Executivo de Julián Bustelo anunciou tamén que está previsto presentar, nas vindeiras semanas, un proxecto de rehabilitación integral da praza Virxe de Guadalupe, así como do inmóbel do Mercado e do estacionamento municipal. O Concello engadiu que esta iniciativa “busca transformar por completo esta zona central da nosa vila”, centrándose tamén en emendar os problemas de infiltración de auga que se veñen rexistrando dende fai anos.
