A Xunta de Goberno local de Rianxo aprobou as bases dunha nova liña de axudas destinada a apoiar as actividades impulsadas polas asociacións de nais e pais (anpas) dos centros escolares rianxeiros. Segundo informou o Executivo, este novo programa de subvencións, que conta cun orzamento de 10.000€, ten por finalidade colaborar nos gastos derivados das actividades formativas e de conciliación familiar desenvolvidas ou promovidas polas asociacións de nais e pais de alumnado dos centro públicos do municipio. As axudas concederanse en réxime de concorrencia competitiva e as anpas poderán formular as súas solicitudes unha vez que se publiquen as bases e a convocatoria no Boletín Oficial da Provincia.
