O Concello de Boiro abre este luns 5 de maio o prazo de inscrición no Campamento Concilia Verán 2025 que se leva a cabo entre o 1 de xullo e o 29 de agosto de 2025, agás sábados, domingos e festivos, para favorecer a conciliación durante a época estival, e destinado a nenos e nenas de entre 3 e 12 anos escolarizados.
O campamento desenvolverase en catro sedes distintas: as instalacións do CEIP Santa Baia de Boiro, do CEIP de Abanqueiro, do Centro Social de Cabo de Cruz e do CEIP Cespón. O servizo levarase a cabo de 8.00 a 14.00 horas ou de 10.00 a 14.00 horas e as inscricións poderán formalizarse para os dous meses ou só un deles.
O desenvolvemento das actividades destes campamentos estará baseado en técnicas de intervención participativas e activas, segundo explicou o Concello, engadindo que estamos ante unha iniciativa para “fomentar a creatividade e os valores de respecto e solidariedade con enfoques non sexistas; con actividades planificadas segundo as idades e necesidades socio-educativas”.
O número total de prazas ofertadas é 220 distribuídas entre os diferentes centros. Para participar é necesario estar empadroado no concello de Boiro, primará a ocupación laboral dos proxenitores ou titores legais e tamén a asistencia de dous meses sobre un. O prezo de participación será de 150 euros/ mes para o horario de 8.00 a 14.00 horas e 110 euros/mes para o horario de 10.00 a 14.00 horas, podéndose aplicar descontos nos casos de segundos irmáns, familias monoparentais ou persoas en exclusión social.
O prazo de inscrición abre o luns 5 de maio e deberase formalizar presentando a documentación requirida mediante o Rexistro Xeral ou sede electrónica. As bases están dispoñíbeis na web municipal.
