No día de hoxe deron comezo en Ribeira as Xornadas de Orientación Profesional da Comarca, un evento promovido polo CIFP Coroso co obxectivo de achegar á cidadanía a oferta educativa e formativa en Formación Profesional (FP) e formación ocupacional dispoñible para o curso 2025-2026. A inauguración contou coa presenza do alcalde, Luís Pérez; o tenente de alcalde, Vicente Mariño; a concelleira de Educación, Cruz Rivadulla; e o director do CIFP Coroso, Manuel Teira.
Durante dous días, 21 e 22 de maio, e nunha carpa instalada no aparcadoiro do centro, o público poderá coñecer de primeira man a ampla variedade de itinerarios formativos e profesionais existentes na comarca, en horario de 10:00 a 14:00 e de 16:00 a 20:00 horas —agás o xoves, que pola tarde será de 16:00 a 18:00.
Segundo o propio centro, “levamos 11 anos facendo xornadas de portas abertas e visitas guiadas, pero este ano quixemos dar un paso máis”, sinalan dende a organización.
Participación educativa e empresarial
Na vertente educativa participan entidades como Ambar, AMICOS, o Programa Integrado de Emprego, o IES Espiñeira, IES Félix Muriel, IES de Ames, IES Leliadoura, a Escola Náutico-Pesqueira e o CPR Divino Maestro. A nivel empresarial, están presentes compañías e colectivos como Utillaje Pontevedra, Congalsa, Jealsa, Escurís, Grupo Resnova, Climafrío, Stac, Limpezas Noroeste, Pet Select, Alro Maquinaria, así como as asociacións de empresarios da construción e hostalería.
Esta mañá visitaron a carpa arredor de 80 alumnos e alumnas de 4º da ESO procedentes do IES Leliadoura, o CPR Bayón e o IES da Pobra. Para mañá xoves está prevista a asistencia do alumnado do CPR Milagrosa, IES A Cachada e o IES Félix Muriel, sumando outros 80 estudantes.
Ademais das visitas guiadas polas instalacións do CIFP Coroso, a organización lembra que as xornadas están abertas a toda a poboación, independentemente da súa idade ou nivel de formación.
Un compromiso coa formación e o emprego
Durante a apertura, o alcalde Luís Pérez destacou a importancia da formación continua: “Nun mundo laboral en constante evolución, a formación xa non é unha opción, senón unha necesidade. Ribeira quere ser un referente en formación e empregabilidade, e desde o Concello apoiaremos sempre iniciativas que axuden á cidadanía a atopar un camiño profesional con futuro.”
Pérez tamén felicitou ao CIFP Coroso pola organización das xornadas e valorou positivamente a implicación dos centros educativos e das empresas participantes. Subliñou que “é imprescindible que as persoas, independentemente da súa idade, estean abertas a reciclarse, aprender e mellorar”.
Estas xornadas, segundo engadiu, representan unha excelente oportunidade para coñecer a realidade educativa e laboral da contorna e para poñer en valor a Formación Profesional como unha vía directa cara ao emprego de calidade.
