O Concello de Boiro, a través do Centro Arqueolóxico do Barbanza (Neixón) organiza este sábado 31 de maio unha actividade divulgativa para a rapazada e para os maiores: unha visita en familia aos Castros de Neixón.
A actividade, prevista a partir das 11.30 horas, terá unha duración de 75 minutos e o obxectivo é mostrar ás persoas participantes como vivían os antigos castrexos, explorando os segredos e costumes.
“Trátase dunha viaxe fascinante á historia para grandes e pequenos”, adiantan dende o Centro Arqueolóxico do Barbanza, engandindo que ao remate da visita guiada “a boneca Navia poderá ser adoptada por unha familia para pasar unhas vacacións especiais”.
Máis información sobre a visita e sobre como inscribirse no QR que acompaña o cartaz.
