Este venres 9 de maio arrinca a segunda edición do Bruón Folk Fest 2025, o festival de Artes (Ribeira) que celebra a música, a palabra e a cultura galega e que porá o foco, nesta segunda convocatoria, na literatura popular oral e a súa fonda conexión coa música tradicional. A cita comeza o venres 9 de maio pola tarde, no corazón do festival localizado no Centro Recreativo de Artes.
Organizado pola Asociación Cultural Os Liantes, o festival quere comezar esta edición poñendo en valor a riqueza da nosa tradición oral, nun ano en que o Día das Letras Galegas homenaxea, precisamente, ás cantareiras e á literatura popular.
O programa de actividades deste venres 9 de maio inclúe unha mesa redonda que contará coa moderación de Nel Vidal Barral, figura recoñecida no ámbito da normalización lingüística en Galicia, e membro da Sección de Lingua, Literatura e Comunicación do Consello da Cultura Galega. Ocupou tamén a presidencia da Coordinadora de Traballadores/as de Normalización da Lingua (CTNL) sendo unha das súas caras máis visíbeis e activas nesta entidade.
Acompañarán a Nel Vidal dúas figuras de recoñecido prestixio:
Carlos Callón: Profesor (USC e IES San Clemente) de Castiñeiras (Ribeira), investigador, escritor e presidente de honra da Mesa pola Normalización Lingüística. Autor do recente e aclamado libro Maxicamente vella, eternamente nova. A literatura tradicional galega, Callón achegará unha visión experta sobre a historia e a vitalidade das nosas cantigas, coplas e outras formas de literatura popular.
Lupe Blanco: Referente indiscutíbel da regueifa actual. Considerada unha das mellores regueifeiras do país (gañadora de tres Premios Galegos da Regueifa), é a primeira profesional da improvisación oral cantada en galego e unha peza clave na revitalización e formación de novas xeracións nesta arte a través da Escola de Regueifa de Carballo e numerosos obradoiros.
A continuación da mesa redonda celebrarase unha foliada libre, arredor das 22.00 horas.
A organización avanzou que “en previsión do mal tempo, vaise dispor de carpa no exterior e, se finalmente chove, as actividades nas que a súa natureza o permita, vanse trasladar ao interior do Centro Recreativo”.
Programa do sábado, 11 de maio
11:00 Foliada Infantil.
12:00 Obradoiro artesanía.
12:30 Actuación Cé Orquestra Pantasma
14:00 Actuación As Maianas
15:00 Obradorio escultura.
16:30 Actuación Os Monifates.
17:30 Micro Aberto
Xogos infantís
18:30 Obradoiro infantil Chaveiros.
20:30 Obradoiro de baile tradicional con Gabriel das Chamosas.
21:30 Actuación Os Liantes.
22:30 Actuación Boroa.
23:45 Actuación Isidro Vidal.
01:00 Actuación Habelas Hainas.
02:30 Himno Bruón.
