A empresa boirense JEALSA e a Asamblea Local de Cruz Vermella en Boiro renovaron un ano máis o seu compromiso coa educación social ao asinar a continuidade do programa Ludieduca, unha iniciativa que xa se consolidou como referente no ámbito educativo da comarca.
Desde a súa creación no ano 2012, Ludieduca leva once edicións desenvolvéndose con éxito e medrando grazas á colaboración entre ambas entidades. Na actualidade, o programa está presente en oito centros de Educación Infantil e Primaria dos concellos de A Pobra do Caramiñal e Boiro.
Segundo datos ofrecidos por JEALSA, este ano participarán máis de 200 nenos e nenas, que se beneficiarán dunha proposta centrada na participación infantil e na transmisión de valores fundamentais como o respecto, a igualdade e a inclusión, traballados dende o contexto escolar e familiar.
Como novidade desta edición, introdúcese un módulo específico sobre o uso responsable das novas tecnoloxías, unha resposta directa á preocupación crecente polo impacto dixital na infancia.
Durante o acto de presentación, Margarita Hermo, en representación de JEALSA, subliñou que “a educación en valores debe comezar no fogar, pero tamén é responsabilidade das empresas comprometidas co seu entorno”, destacando o orgullo da compañía por renovar esta colaboración.
Pola súa banda, o presidente da Asemblea Local de Cruz Vermella, Julio García Varela, afirmou que “a través de Ludieduca buscamos inculcar valores fundamentais que a sociedade precisa e que deben transmitirse desde as primeiras etapas da vida”.
Con esta nova edición, Ludieduca reafirma o seu papel como proxecto educativo integral e ferramenta clave na construción dunha sociedade máis responsable e solidaria.
Canal Rías Baixas:
