O Centro Social de Escarabote vai acoller este 9 de maio unha nova cita cultural de homenaxe ao escritor, debuxante e político rianxeiro Alfonso Daniel Rodríguez Castelao. Trátase da función familiar Castelao, un corazón á intemperie, a cargo de Fantoches Baj. Será a partir das 19.00 horas en Agramuíña. A sesión encádrase no programa cultural do Ano Castelao da Rede de Dinamización Lingüística, que contará con diversas actividades orientadas a celebrar a figura do escritor, artista e político de Rianxo.
Trátase dunha peza de teatro dirixida a nenos e nenas a partir dos 6 anos e mais ás súas familias. Nela veremos a Varela Buxán (dramaturgo e director de escena que no seu día dirixiu a estrea d’Os vellos non deben de namorarse) render a súa particular homenaxe a Castelao. Nun pequeno escenario, vai narrar as vicisitudes da súa vida e vai representar algúns dos seus fitos literarios apoiándose en diferentes técnicas escénicas. Deste xeito O pai de Migueliño contarao con viñetas a modo do Kamishibai, Peito de Lobo representarao usando un cabezudo, para o primeiro cadro do segundo lance d’ Os vellos non deben de namorarse empregará monicreques e para o monologo d’ Un ollo de vidro valerase da técnica do teatro de máscaras.
