O vindeiro sábado 10 de maio ás 19:30 horas, a lonxa de Cabo da Cruz acollerá o evento “Cantareiras de Cabo: memoria, lingua e tradición”, unha xornada cultural organizada pola Asociación Gamela coa colaboración do Concello de Boiro e a A.C. Barbantia. Esta cita nace co obxectivo de promover e poñer en valor a lingua galega, as tradicións populares e o patrimonio inmaterial que define a identidade do pobo galego.
A programación inclúe unha intervención da escritora e activista cultural Mila Torrado (A.C. Barbantia), quen abordará temas como a historia, a lingua e a palabra na cultura galega. A continuación, ofreceranse actuacións musicais de grupos tradicionais como Mar de Cabo, Nunca é tarde, as regueifeiras do CEIPP Santa María do Castro e Rebuldeiras.
O encontro rematará cun serán e unha festa popular amenizada por Ar de Loureda, convidando á veciñanza a compartir unha noite de música, baile e celebración da cultura galega.
A organización anima á participación aberta de familias, centros educativos, colectivos e persoas de todas as idades, facendo un chamamento á difusión do evento como unha oportunidade para fortalecer a nosa memoria colectiva e o uso do galego nun ambiente festivo e integrador.
