O Concello de Boiro colabora co Club de Remo Cabo de Cruz na celebración dunha nova edición do Campionato Galego – Xunta de Galicia de Traiñeiriñas (Trainerillas) e que se celebra os días 17 e 18 de maio no peirao de Cabo de Cruz. O concelleiro de Deportes, Marcos Fajardo, participou na presentación xunto con Luis Piñeiro, presidente do Club de Remo Cabo de Cruz; Gustavo Vázquez, membro da Federación Galega de Remo; e Margarita Hermo, directora de Relacións Institucionais de JEALSA, histórica empresa patrocinadora do Club de Remo de Cabo.
O sábado pola mañá disputaranse a V bandeira de veteranas e a III bandeira de veteranos nas que van participar 9 equipos masculinos e 4 femininos en 3.500 e 1.750 metros respectivamente. Pola tarde, a partir das 16.30 horas terán lugar as regatas clasificatorias do campionato galego de traiñeiriñas das categorías cadete, xuvenil e absoluto no que participan máis de 300 deportistas. A fase final será o domingo a partir das 11.30 horas.
