O concelleiro de Política Social, Raúl Treus, acudiu como representante do Concello de Boiro ao 3º Encontro Estatal de Gobernos Locais e Cooperación Internacional que tivo lugar na localidade valenciana de Gandía xunto co presidente da entidade e alcalde de Nigrán, Juan González, e outros seis representantes de concellos galegos.
O obxectivo destas xornadas, nas que participan máis de 250 representantes políticos e técnicos municipais de todo o Estado, foi debater sobre o papel chave das administracións locais na solidariedade internacional e os desafíos que enfrontan.
O programa do 3º Encontro Estatal de Gobernos Locais e Cooperación Internacional estrutúrase en cinco plenarias que abordan a cooperación multinivel, os retos do actual contexto nacional, a achega do municipalismo á axuda oficial ao desenvolvemento, o impacto do novo real decreto de subvencións e a cooperación feminista.
O Concello de Boiro é socio do Fondo Galego de Cooperación e Solidariedade e forma parte dos 116 concellos e catro deputacións de Galicia que o integran, concentrando a través desta rede esforzos no eido da cooperación aos desenvolvemento.
Garántese deste xeito unha xestión profesional e transparente, así como a realización de proxectos con impacto nos países do sur global e a sensibilización da sociedade galega a prol da solidariedade internacional. O Fondo Galego vai cumprir 28 anos tendo apoiado uns 200 proxectos en máis de trinta países e promovendo numerosas actividades e materiais en relación aos desequilibrios Norte-Sur e Axenda 2030.
