Este martes 27 de maio, o Casino de Noia acolleu a presentación dun ambicioso proxecto realizado polo alumnado de primeiro curso do Ciclo Superior de Xestión de Vendas e Espazos Comerciais do Colexio María Assumpta, con sede no concello noiés. A proposta consistiu no deseño e organización integral dunha feira comercial, como simulación real dentro da súa formación profesional.
A feira, que levou por nome Quilómetro 0, Orgullosos do noso, foi concibida como “un evento local con identidade propia, pensado para poñer en valor o comercio de proximidade, a sustentabilidade e o produto da zona”. Durante o acto, o concelleiro de Comercio de Noia, Pepe Pérez Martínez, coñeceu de primeira man todos os detalles do proxecto, valorando “moi positivamente” o enfoque profesional do alumnado e cualificando algunhas das súas propostas como “especialmente interesantes polo seu potencial de aplicación real no municipio”. Tamén estiveron presentes a xefa de estudos do centro, as profesoras do ciclo superior e alumnado do ciclo medio, que apoiaron o labor das e dos estudantes.
Segundo informou o alumnado responsábel do proxecto, este foi traballado de forma exhaustiva desde todos os módulo: “Traballáronse contidos como o deseño do evento, a investigación de mercados, a planificación financeira, a mercadotecnia (marketing) e a publicidade, o deseño de planos e a difusión en redes sociais. Ademais, integrouse de maneira transversal o valor da sustentabilidade, presente en todas as fases do traballo.
Non faltou a creación de recursos dixitais en formato vídeo, elaborados en galego, castelán e inglés, fomentando tanto a competencia dixital como lingüística do alumnado. Estes vídeos, compartidos en redes sociais como parte da estratexia de comunicación, provocaron un pequeno fenómeno local: varios comercios e veciños de Noia contactaron co Colexio para interesarse polas datas da feira, pensando que realmente ía celebrarse. A xefa de estudos compartiu esta anécdota con orgullo, como mostra do impacto real do traballo do alumnado na comunidade.
Por outra banda, tamén se abordaron aspectos administrativos esenciais como a tramitación de licenzas, obrigacións fiscais e laborais, así como o estudo de subvencións e axudas públicas.
Desde o centro educativo destacaron que “esta forma de traballar por proxectos permite ao alumnado aplicar de forma integrada os coñecementos de todos os módulos, axudándolles a conectar conceptos e a desenvolver unha visión global do ciclo formativo e do mundo profesional”.
