A Piscina Municipal de Rianxo presenta o seu Campus de Verán 2025, unha proposta dirixida a nenos e nenas de entre 3 e 13 anos que combina deporte, diversión, aprendizaxe nun entorno seguro e estimulante.
O programa desenvolverase do 23 de xuño ao 5 de setembro nas instalacións do centro deportivo e estruturarase en quendas semanais, cun horario principal de 10:00h a 14:00h. Para facilitar a conciliación da vida familiar e laboral durante os meses de verán, o programa tamén ofrecerá servizo de madrugadores a partir das 9:00h.
O campamento está deseñado para fortalecer distintas capacidades entre os máis pequenos, incluíndo o desenvolvemento deportivo, a creatividade, a aprendizaxe lúdica e a autonomía persoal. Ao longo de cada semana, os participantes poderán participar en actividades como xogos acuáticos, natación, multideporte, obradoiros creativos, dinámicas en grupo e excursións temáticas, acción que fomentan tanto o movemento como a imaxinación e a convivencia.
As inscricións xa están abertas e deben formalizarse na Piscina Municipal. Ofrécense descontos para persoas socias do centro e para o segundo fillo e seguintes. Os detalles completos sobre actividades, prezos e horarios poden consultarse na web https://beone.es/campamentoverano/galiciagal/.
