Axentes adscritos á Comisaría da Policía Nacional de Ribeira procederon á detención dun home como presunto autor de seis delitos de roubo con forza.
Cinco destes roubos foron cometidos no interior de senllos vehículos aos que, tras fracturar os portelos, accedía ao seu interior e subtraía diversos efectos. O mesmo autor tamén accedeu ao interior dun garaxe comunitario, forzando un rocho do que subtraeu diversos efectos. Ademais, cometeu numerosos furtos en interior de vehículos, accedendo aos mesmos sen que houbese forzamento.
Por outra banda, tamén se lle imputa un delito de estafa. O ladrón, tras furtar un teléfono móbil e acceder á aplicación bancaria da vítima, logrou transferir máis de 6000 euros á súa conta. Neste delito tivo participación unha muller, parella sentimental do home, quen tamén foi detida.
Unha exhaustiva investigación foi a que logrou o total esclarecemento dos feitos, identificando os autores e procedendo á súa detención.
Tras tramitarse as correspondentes dilixencias policiais, os detidos foron postos ao dispor do Xulgado de Instrución número Un de Ribeira, en funcións de garda, quen decretou o ingreso en prisión provisional do home.
